सुन्दरहरैँचा । सुन्दरहरैँचा नगरपालिका र सुन्दरहरैँचा उधोग वाणिज्य संघ बिच अन्तरक्रिया कार्यक्रम सम्पन्न भएको हो । बिहीवार नगरपालिकाको सभाहलमा संघका अध्यक्ष कृष्ण रिजाल र नगरप्रमुख केदारप्रसाद गुरागाई लगायत संघका पुर्व अध्यक्ष र पदाधिकारीहरु बिच अन्तरक्रिया कार्यक्रम भएको हो ।
चाडपर्व लक्षित सुरक्षा दृष्टिकोणलाई मध्यानजर गर्दै व्यवसायीको सुरक्षालाई ध्यानमा राख्न नगर जिम्मेवार हुनुपर्ने संघका अध्यक्ष रिजालले बताएका थिए । उनले नगर भित्र उपभोक्ताले प्रयाप्त सामान पाउन नसक्दा यहाँका उपभोक्ता समेत सुन्दरहरैचा भन्दा बाहिर गएर सामान खरिद गर्न वाध्य रहेको स्मरण गराउदै नगरले नगर भित्रै उधोग स्थापना गर्न सकिने बातावरण बनाउन जोड दिनुपर्ने बताएका थिए ।
संघका पुर्व अध्यक्ष भोलेश्वर दुलालले नगरले विना पहिचान व्यवसायी भन्दै फर्म दर्ता गरेकाले पछिल्लो समय विभिन्न घटनामा नगरपालिकाको नाम मुछिएर आउने समाचारले नगरकै बदनाम भएको बताएका थिए । दुलालले नगरले शुरुमा व्यवसायीको फर्म दर्ता गर्नुपुर्व उधोग वाणिज्य संघमा व्यवसाय दर्ता गरेपश्चात मात्र नगरले व्यवसायिक फर्म दर्ता गर्नुपर्नेमा जोड दिएका थिए ।
नगरप्रमुख केदारप्रसाद गुरागाईले अहिले हरेक व्यक्तीले सजिलै पैसा कमाउन सकिने व्यवसाय रोज्ने गरेकाले समेत नगरमा अपर्याप्त सामानहरु हुने गरेको बताए । अहिले व्यवसाय फेसन जस्तो हुने गर्दछ , एउटाले एउटा व्यवसाय गर्छ त्यसको सिको गरेर अर्कोले त्यही प्रकृतिको व्यवसाय गर्छ यसले झन जटिलता उत्पन्न गराउने बताए । गुरागाईले नगरमा औधोगिक कारीडोर स्थापनामा जोड दिने बताए । उनले नगरमा कसैले उधोग स्थापना गर्न चाहेमा नगरले आफू मातहतमा रहेका सरकारी जग्गा लिजमा दिने समेत बताए ।
संघका महासचिव नारायण कार्कीले उपभोक्ता हकहितका निम्ति संघले नगरापालिका सग अन्तरक्रिया कार्यक्रम तथा छलफल गरेको बताए । उनले व्यावसायीहरुका हकहित संरक्षणका निम्ति सदैव प्रयत्नशील रहेको र संघ नगरपालिका सग व्यवसायीहरुको हकहितका लागि सहकार्य गर्न तयार रहेको बताएका थिए ।
छलफलबाट व्यवसायीको क्षमता अभिबृद्धि गर्ने गरी तालिम संचालन गर्ने, सडक क्षेत्रमा राखिएका निर्माण सामग्री हटाई सडक क्षेत्र कायम गर्ने, फुटपाथ रुपमा संचालन हुदै आएका व्यवसायलाई व्यवस्थापनमा पहल गर्ने, ऐलानी जग्गा खोजी र व्यवस्थापन गर्ने, मालपोत र व्यवसाय कर प्रभावकारी बनाउन नगरपालिका र वाणिज्य संघ बिच सहकार्य गर्ने, व्यवसाय दर्ता र नविकरण गर्न उद्योग वाणिज्य संघको सिफारिस अनिवार्य गर्ने निणर्य गरेको छ ।
बिहीवार भएको अन्तरक्रिया कार्यक्रममा सुन्दरहरैँचा उधोग वाणिज्य संघले २५ बुदे सुझावहरु नगरपालिकालाई दिएको छ ।
