सुन्दरहरैँचा । मोरङको सुन्दरहरैँचा नगरपालिकामा कृषकहरुलाई विभिन्न तालिम सञ्चालन गरिएको छ । वडा नं ७ मा रहेको संकल्प एग्रोटेक प्रा लि ले श्रीकृष्ण इन्नोभेसन हब सगको साझेदारीमा नगरका कृषक व्यवसायीहरुका लागि तालिमको आयोजना गरेको हो ।
एग्रोटेकले विभिन्न कृषक समूह र सहकारीहरुको लागि ब्यबसायिक बाख्रापालन र गाई भैसी तालिम सञ्चालन गरेको हो । दुर्गम क्षेत्रमा रहेको मासुजन्य र दुध जन्य बस्तुको उत्पादन र उत्पादकत्व बृद्धि संगै आवश्यक कच्चापदार्थको उपलब्धता, प्राविधिक सेवा प्रदान, बीमा सेवा, तालिम र परामर्श सेवा, बित्तिय पहुँच सहजीकरण तथा बजार सुनिश्चित कसरी गर्ने भन्ने बिषयमा तालिममा जानकारी गराइएको एग्रोटेकका सञ्चालक सुरेश रेग्मीले जानकारी दिए ।
तालिममा कृषि स्नातक र पशु चिकित्सकबाट सैद्दान्तिक र ब्यबहारिक सीप प्रदान गर्नका लागि एग्रोतेकले दक्ष परामर्शदातालाई मुख्य प्रशिक्षकको रुपमा राखेको थियो । तालिममा सैद्दान्तिक ज्ञान र व्यवहाँरिक ज्ञान दुवै दिएको रेग्मीले बताए । तालिम पश्चात कृषकले आँफै रोजगारीको सृजना गर्न सक्ने एग्रोटेकका बित्त तथा प्रशासन प्रमुख सुशीला ढकालले बताइन ।
एग्रोटेकले यस आर्थिक वर्षमा पाचँ सय जनालाई बाख्रापालन सम्बन्धी तालिम, एक सय जनालाई मत्स्यपालन तालिम र पाँच सय ठूला पशुका उद्दमीलाई व्यवसायिक तालिम सञ्चालन गर्ने लक्ष्य निर्धारण गरेको छ ।
