सुन्दरहरैचा । सुन्दरहरैचा नगरपालिकाले फोहोर डम्पिङ गर्न खरिद गरेको जग्गा बेवारीसे अवस्थामा छ । सुन्दरहरैचा नगरपालिका वडा नं १ मा रहेको नगरपालिकाको करिब दुई बिघा पाच कठ्ठा जग्गा बेवारीसे अवस्थामा रहेको हो ।
साबिक ईन्द्रपुर गाविस हुँदा फोहोर व्यवस्थापन गर्ने प्रायोजनका लागि उक्त जग्गा गाविसमा रहेका विभिन्न संघ सस्थाले र ईन्द्रपुर गाविसको सहकार्यमा रकम उठाएर उक्त जग्गा खरिद गरेका थिए । स्थानिय संघ सस्था र ईन्द्रपुर गाविसको सहकार्यमा खरिद गरेर सात वर्ष अघी ईन्द्रपुर गाविसको नाममा उक्त जग्गा उपलब्ध भएको थियो । हाल उक्त जग्गा ईन्द्रपुर गाविसको नाममा नै रहेको छ ।
फोहोर व्यवस्थापन गर्न खरिद गरेको जग्गा प्रशस्त हुँदा हुँदै पनि नगरपालिकाले हाल नगरमा उत्पन्न भएको फोहोर बाघझोडा जंगलमा लगेर फाल्दै आएको छ ।नगरको नाममा आएको जग्गामा भने विभिन्न बिरुवा रोपेर त्यतिकै राखिएको छ । नगरले महिनाको ९,००० तलबमा उक्त जग्गा हेर्न भनेर एक जना कर्मचारी समेत राखेको छ । उक्त जग्गा बेलबारी नगरपालिका र सुन्दरहरैचा नगरपालिकाको सिमाना रहेको लोहन्द्रा खोलाको किनारमा पर्दछ ।
जग्गाको उचित सदुपयोग नभएको स्थानियको गुनासो छ । फोहोर जंगलमा लगेर बेवारीसे अवस्थामा फाल्दा बातावरण प्रदुषण समेत हुने गर्दछ । तर भएको जग्गा सदुपयोग गरेर नगरले उक्त जग्गामा फोहोर व्यवस्थापन गर्न कुनै चासो देखाएको छैन ।
सात वर्ष अघी ईन्द्रपुर गाविसको नाममा आएको उक्त जग्गाको बिषयमा नगर भने बेखबर छ । जग्गा सरक्षण गर्न एक जना कर्मचारी नगरले राखेता पनि उक्त जग्गालाई कसरी व्यवस्थापना गर्न सकिन्छ भन्ने नगरमा कुनै दिगो योजना छैन ।
नगरका प्रमुख प्रशासकिय अधिकृत विनोद भट्टराईले आफु नयाँ भएकोले यो बिषयमा जानकार नभएता पनि जनप्रतिनिधी र यहाँका अन्य सरोकारवाला निकाय सग छलफल गरेर उक्त जग्गाको उचित सदुपयोग गरिने बताए । उनले साविक हरैचा, साविक ईन्द्रपुर, साविक मृगौलिया लगायतका अन्य धेरै गाविसहरु मिलेर सुन्दरहरैचा नगरपालिका बनेको कारण पनि नगरमा डाटा हराएको हुन सक्ने बताए ।
मेयर केदारप्रसाद गुरागाईले आफुलाई उक्त जग्गाको बिषयमा ज्ञान भएको स्वय आफु पनि जग्गा खरिदमा सलग्न भएको हुँदा जग्गाको उचित सदुपयोग गर्न आफु लागिपर्ने बताए । उनले आफुले सरकारी जग्गा खोज्ने एउटा अभियान नै चलाऊन खोजेको बताएका छन ।
