सुन्दरहरैचा । सुन्दरहरैचा नगरपालिकाले करारका कर्मचारी निकाल्ने बिषयलाई लिएर वडाध्यक्षहरुले विरोध गरेका छन । सोमबार नगरप्रमुख र प्रमुख प्रशासकिय अधिकृतलाई ध्यानाकर्षण पत्र बुझाउदै वडाध्यक्षहरुले विरोध गरेका हुन ।
वडाध्यक्षहरुले मेयर केदारप्रसाद गुरागाईले करारका कर्मचारी हटाउने बिषय छलफल नगरी एक्कासी नगरसभामा पेश गराएको भन्दै आपत्ती जनाएका हुन ।
सोमबार बिहान नगरप्रमुखको कार्यकक्षमा सुन्दरहरैचा वडा नं १ का वडाध्यक्ष राम विश्वास खवास, वडा नं २ का विवश प्रधान, वडा नं ४ का कैलाश श्रेष्ठ, वडा नं ६ का सन्तोष लिङ्देन, वडा नं ७ का भुवन सिंह मगर, वडा नं ९ का प्रकाश श्रेष्ठ र पुर्व वडाध्यक्ष वडा नं ३ का जीवन ढुंगाना, वडा नं ४ का शैलेन्द्र श्रेष्ठ र वडा नं ७ का चैतन्यप्रसाद सिटौलाले सयुक्त रुपमा विज्ञप्ती निकालेर विरोध गरेका हुन ।
ध्यानाकर्षण पत्र बुझाउदै वडा नं ४ का वडाध्यक्ष कैलाश बस्नेतले नियोजित रुपमा नगरप्रमुखले करार कर्मचारी हटाउन लागेको आरोप लगाए । उनले करार कर्मचारी राख्न नपाउने हो भने अगाडि के कारणले नगरपालिकाले राख्यो यस बिषयमा छलफल हुनु पर्ने बताए ।
नगरपालिकाले श्रावण १ गते देखी प्रकृया विपरित कर्मचारी नियुक्ती भएकालाई हटाउने निर्णय गरेको नगरप्रमुख केदारप्रसाद गुरागाईले बताए । उनले आफुले गरेको निर्णयबाट आफु पछी नहट्ने समेत बताए ।
वडा नं ३ का पुर्व वडाध्यक्ष जीवन प्रसाद ढुंगानाले नियोजित रुपमा कर्मचारी हटाउने निर्णय आपती जनक रहेको बताए । उनले नगरप्रमुखले नियोजित रुपमा कर्मचारी हटाएर आफ्ना आसेपासेको भर्ती केन्द्र बनाउन लागेको समेत आरोप लगाए ।
वडा नं ४ का पुर्व वडाध्यक्ष शैलेन्द्र श्रेष्ठले राजनीतिक पुर्वाग्रह राखेर गलत निर्णय नगर्न आग्रह गरे । उनले नगरमा भएका सबै कर्मचारीलाई हटाएर नयाँ कर्मचारी राख्नु तर राजनीतिक पुर्वाग्रह राखेर कसैलाई पाखा र कसैलाई साथ दिन नमिल्ने बताए ।
