सुन्दरहरैचा । मोरङको सुन्दरहरैचा नगरपालिकामा रहेको कनकलक्ष्मी सहकारीमा बचतकर्ताको ४६ लाख भन्दा बढी रहम हिनामिना भएको छ । शुरुमा ३१ लाख हिनामिना भएको पाइए पनि छानविन गर्दा ४६ लाख ८७ हजार ९ सय ८० रूपैयाँ घोटाला गरिएको पुष्टि भएको छ ।
सहकारीमा ३१ लाख रकम हिनामिना भएको पुष्टि भए पछी सहकारीले सचिव यमप्रसाद सिग्देलको संयोजकत्वमा छानविन समिती बनाएको थियो । समितिले छानविन पश्चात ४६ लाख भन्दा बढी रकम हिनामिना गरेको पुष्टि गरेको छ ।
सहकारीमा ठुलो रकम हिनामिना भएपछी सहकारीका कर्मचारी विवेक खवासलाई प्रहरीले पक्राउ गरेको छ । खवासले शुरुमा आफुले ३१ लाख मात्र रकम हिनामिना गरेको स्विकार गरेका थिए ।
रकम हिनामिनाको पुष्टि भएपछी सहकारीले खवासलाई भदौ १० गते भित्र सबै रकम फिर्ता गराउने सहमति यसअघि नै खवासलाई गराइएको थियो। तर पुन: छानविन समितिले सहकारीको ठुलो रकम हिनामिना गरेको पुष्टि गरेपछी शुक्रबार खवासलाई प्रहरीले पक्राउ गरेको हो ।
खवास सहकारीको गोठगाउँ सेवा केन्द्रका कर्मचारी हुन । उनले बचतकर्ताको पैसा सफ्टवेयरमार्फत सहकारीमा जम्मा भएको देखाउने तर रकम भने नक्कली हस्ताक्षर गरेर आफैंले लैजाने गरेको प्रहरीको प्रारम्भिक अनुसन्धानबाट खुलेको छ ।
बाचातकर्ताले भने सहकारीमा खवास एक्लैले यत्रो रकम हिनामिना गरेको स्विकार गर्दैनन । उनिहरुले सहकारीको रकम हिनामिना हुनुमा ठुलै योजना सहित धेरैको संलग्नता रहेको बताउछन ।
