इटहरी । दुहबी ६ का १८ वर्षीय अफरोज मियाको हत्या भएको प्रहरीको प्रारम्भिक अनुसन्धानले देखाएको छ । अफरोज मिया केही दिन देखी बेपत्ता थिए ।
प्रहरी अनुसन्धानका क्रममा पक्राउ परेका तीन जना व्यक्तीले अफरोज मियाको हत्या गरी मोरङ र सुनसरीको सीमामा रहेको बुढीखोलामा फालेको प्रहरीलाई बताएका छन । तिन जना अफरोज मियाकै नजिकका साथीहरु रहेको प्रहरी अनुसन्धानबाट खुलेको छ ।
इलाका प्रहरी कार्यालय दुहबीका प्रहरी निरीक्षक जयदेव माझीले अफरोजको हत्यामा संलग्न भएको आरोपमा उनकै तीनजना साथीहरूलाई आइतबार पक्राउ गरेको र सबैले हत्या स्वीकार गरेको जानकारी दिए ।
प्रहरीको अनुसन्धानले अफरोजको शुक्रबार हत्या भएको जनाइएको छ । अफरोजलाई गाजा काट्ने छुरा र रड प्रहार गरेर बुढीखोलामा फालेको पक्राउ परेका साथीहरुले प्रहरीलाई बयान दिएका थिए ।
अहिले प्रहरीले बुढीखोला क्षेत्रमा शव खोज तलास भइरहेको प्रहरी निरीक्षक माझीले जानकारी दिए । शुक्रबारदेखि बेपत्ता भएका अफरोजका परिवारले शनिबार दर्ता गराएको उजुरीका आधारमा उनको खोजी भइरहेको थियो । अपराध न्युजबाट सम्प्रेषित
