इटहरी । सुनसरीबाट मोबाइल चोरीमा संलग्न दुई जनालाई प्रहरीले पक्राउ गरेको छ । इटहरी उप-महानगरपालिका-९ स्थित रहेको मोबाइल पसलबाट मोबाइल चोरी गर्ने २ जनालाई प्रहरीले पक्राउ गरेको हो ।
पक्राउ पर्नेमा लिसंखुपाखर गाउँपालिका-९ सिन्धुपाल्चोकका २३ बर्षीय सुरेश तामाङ र शिवपुरी गाउँपालिका-४ नुवाकोट घर भई काठमाण्डौको टोखा वस्ने १९ बर्षीय सन्तोष मगर रहेका छन ।
उनीहरुले यही जेष्ठ १५ गते राती मोबाइल पसलको सटर फोडी ३ लाख बरावरको बिभिन्न कम्पनिको मोबाइलहरु चोरी गरेका थिए । चोरी भएको जानकारी तत्कालै प्राप्त हुनासाथ इलाका प्रहरी कार्यालय इटहरीबाट खटिएको प्रहरी टोलीले चोरीमा संलग्न भई फरार रहेका तामाङ र मगरलाई काठमाण्डौमा लुकिछिपि बसेको अवस्थामा चोरी भएको ३ वटा मोबाइल सेट सहित पक्राउ गरेको हो ।
पक्राउ परेका दुवै जनालाई सुनसरी जिल्ला अदालतवाट चोरी मुद्दा शिर्षकमा म्याद थप गरी प्रहरीले थप अनुसन्धान गरिरहेको छ ।
