सुन्दरहैचा । मोरङको सुन्दरहरैचा १० मा रहेको द राइजिङ बोर्डिङ स्कुलले मतदान प्रकृयाबाट विद्यालयमा क्याप्टेन र भाइस क्याप्टेनको छनोट गरेको छ । विधार्थीहरुलाई मतदानका बारेमा जानकारी दिन विद्यालयमा क्याप्टेन र भाइस क्याप्टेनको निर्वाचन प्रकृयाबाट छनोट गरिएको हो ।
शुक्रबार भएको निर्वाचनमा विभिन्न पदमा विभिन्न कक्षाबाट १९ जनाले उम्मेद्वारी दिएका थिए । जसमा क्याप्टेन सुमन गजुरेल भाईस क्याप्टेन युनिस्का रायमाझी र माैसम राई त्यस्तै सदस्यमा स्वस्तिका गजुरेल, उज्वल गिरी,प्रतिज्ञा श्रेष्ठ र मुना कार्की निर्वाचित भएको भाईस प्रिन्सिपल पर्शुराम गुरगाई जानकारी दिए ।
कक्षा ३ देखि १० सम्मका विद्यार्थीले प्रतिनिधि चुन्न पाउने व्यवस्था रहेकाले ७ सय भन्दा बढी मतदाता रहेको प्रमुख निर्वाचन आयुक्त तथा विद्यालयका शिक्षक मिलन भट्टराईले बताए ।
कार्यक्रममा विद्यार्थीका अभिभावक समेतको उपस्थिति रहेको थियो । कार्यक्रममा विद्यार्थीले नृत्य र गायन मार्फत् मनोरन्जन समेत गराएका थिए ।
