सुन्दरहरैचा मोरङको सुन्दरहरैचा नगरपालिकामा भुमी आयोगले सुकुम्बासी र अव्यवस्थित बसोबासको जग्गा नापजाँच गर्ने कार्य शुरु गरेको छ ।
केन्द्रिय भुमिआयोगका अध्यक्ष केशब प्रसाद निरौला र नगरप्रमुख शिवप्रसाद ढकालले बुधबार सुन्दरहरैचा नगरपालिकाको वडा नं १० बाट सुकुम्बासी र अव्यवस्थित बसोबासको जग्गा नापजाँच गर्ने कार्यको शुभारम्भ गरेको हो ।
जग्गा नापजाँच कार्यको शुभारम्भ गर्दै भुमी आयोगका केन्द्रिय अध्यक्ष केशव निरौलाले जग्गा नापजाँच कार्यको देश भरिको पहिलो नगरपालिका सुन्दरहरैचा भएको बताए । उनले आफ्नै कार्यकालमा अब केही महिनामा नै नगरका हरेक सुकुम्बासी वस्तीहरुमा हातहातमा लालपुर्जा उपलब्ध गराउने बताए ।
नगरप्रमुख ढकालले नगरमा करिब ६ हजार भन्दा बढी रहेका सुकुम्बासीहरुको हातहातमा आफुले आफ्नै कार्यकालमा लालपुर्जा उपलब्ध गराउने बताए । सुकुम्बासीहरुलाई कम्युनिष्टले भोट बैकमा मात्र सिमित राखेको र सुकुम्बासी वस्तीमा राजनिती नगर्न आग्रह गरे । उनले अब केही महिनामा नै आफ्ना नगरका सुकुम्बासी वस्तीमा सुकुम्बासीको हातहातमा लालपुर्जा आइपुग्ने बताए ।
नगरप्रमुख ढकालले स्थानिय तह अगावै सबै सुकुम्बासीको हातहातमा लालपुर्जा वितरण गर्ने तयारी स्वरुप आफू अगाडि बढेको बताए ।
नगरले बुधबार देखि वडा नं १० बाट सुकुम्बासी वस्तीको जग्गा नापजाँच गर्ने कार्य शुरु गरेको छ ।
