सुन्दरहरैँचा । मोरङको केराबारी गाउँपालिका–८ का २६ वर्षीय बाबुराम भट्टराईको हत्यामा संलग्न एक जनालाई प्रहरीले पक्राउ गरेको छ ।
भट्टराईको हत्यामा संलग्न केराबारी–३ रामपुरका ३५ वर्षीय कमल लिम्बूलाई पक्राउ गरिएको मोरङ प्रहरीका प्रवक्ता डिएसपी मञ्जील मुकारुङले जानकारी दिए । उनका अनुसार लिम्बू केराबारी–रामपुर चल्ने बसका सहचालक भएको खुलेको छ । मादक पदार्थ सेवन (मापसे) गरिरहेका बेला विवाद उत्पन्न भएपछि रडले हानेर लिम्बूले भट्टराईको हत्या गरेको प्रहरीले जनाएको छ ।
प्रहरीको प्रारम्भिक अनुसन्धानबाट हत्या गरेपछि लिम्बू एक्लैले एक घण्टा पर जङ्गलमा लगेर शव रुखको जराभित्र लुकाएको खुलेको छ । ‘घटनास्थलबाट काँधमा बोकेर एक घण्टा पर पुर्याउँदै शवलाई रुखको जराभित्र लुकाएर लिम्बू आफ्नो घर फर्किएको पाइयो,’ डिएसपी मुकारुङले भने, ‘बाटोमा दुई ठाउँ बिसाएर लुकाउने ठाउँसम्म शव पुर्याएको खुलेको छ ।’
लिम्बूविरुद्ध कर्तव्य ज्यान मुद्दा चलाउन प्रहरीले आइतबार अदालतबाट म्याद थप गरेर घटनाको बाँकी अनुसन्धान अघि बढाउने भएको छ । प्रहरीका अनुसार रक्सी खाने क्रममा सामान्य विवाद हुँदा लिम्बूले रड प्रहार गर्दा भट्टराई घटनास्थलमै ढलेका थिए । अहिलेसम्मको अनुसन्धानबाट हत्या उनी एक्लैले गरेको खुलेको मुकारुङको भनाइ छ । प्रहरीले भने हत्यामा अरुको पनि संलग्नता रहेको हुनसक्ने आशङ्कामा थप अनुसन्धान भइरहेको जनाएको छ ।
घरबाट मच्छिन्द्र मेला जान भनेर निस्किएका भट्टराईको शव १२ दिनपछि गत माघ ९ गते चारकोसे जङ्गलमा ढलेको रुखको जराभित्र भेटिएको थियो । मेला पुस २३ गतेदेखि २९ गतेसम्म लागेको थियो । आफन्त र परिवारका सदस्यले हत्या गरेर शव लुकाइएको बताउँदै घटनाको सत्यतथ्य पत्ता लगाएर दोषीमाथि कारबाही हुनुपर्ने माग गर्दै आएका थिए ।
गत पुस २७ गतेदेखि हराइरहेका भट्टराईलाई स्थानीयले भने २८ गते मेलामै देखेको बताउँदै आएका थिए ।
उनको शव कुहिएर दुर्गन्ध फैलिएको अवस्थामा फेला परेको थियो । भट्टराई पनि केराबारी–भोगटेनी–रामपुर चल्ने सार्वजनिक बसमा सहचालकको काम गर्थे ।
