सुन्दरहरैँचा । मोरङको सुन्दरहरैँचा नगरपालिका वडा नं १० मा रहेको सुकुना माध्यमिक विद्यालयमा अध्ययनरत विद्यार्थीहरू विद्यालयले सञ्चालन गरेको स्कुल बसको ढोकामा झुन्डिएर यात्रा गरिरहेका छन्।
बसमा सवार जो कोहीलाई सवारी साधनको ढोकामा तथा असुरक्षित तवरले यात्रा गराए त्यसलाई गैरकानुनी कार्य गरेको ठहरिन्छ तर सरकारी विद्यालयका विद्यार्थीहरूले स्कुल बसको ढोकामा झुन्डिएर विद्यालय आईरहेका छन् ।
सुन्दरहरैँचा नगरपालिकाकै गहनाका रूपमा रहेको उक्त विद्यालयमा विद्यार्थीहरू जोखिम मोलेर नै यात्रा गरिरहेका छन्। शैक्षिक क्षेत्र जहाँ ज्ञानगुनका कुराहरू सिकाइन्छ त्यही क्षेत्रमा नै यस्ता गतिविधि हुन्छन् भने विद्यार्थीहरूले त्यहाँबाट के शिक्षा सिक्लान् त ?
यता सुन्दरहरैँचा नगरपालिकाका शिक्षा शाखा प्रमुख रामप्रसाद ढुंगेलले आफूलाई हाल उक्त विषय थाहा नभएको र कतैबाट गुनासो नआएको बताए । उनले त्यसरी विद्यार्थी ओसारपसार गर्न नपाइने बताउँदै सुरक्षित तरिकाले विद्यार्थी ओसारपसार गर्नुपर्ने बताए ।
उनले कसैले नगरको शिक्षा शाखामा गुनासो गरे आफूहरूले विद्यालयको ध्यानाकर्षण गराउँदै आएको समेत बताए ।
यता विद्यालयका प्रधानाध्यापक लक्ष्मी श्रेष्ठले यातायात व्यवस्थापन गर्न केही कठिनाई भएको बताए । उनले धेरै विद्यार्थी र कम स्कुल बस रहेको कारण केही असहज भएको बताए ।
उनले विद्यालयमा भएको बसले मात्र यहाँ अध्ययन गर्ने विद्यार्थीलाई ओसारपसार गर्न असहज भएको कारण यो समस्यालाई समाधान गर्न विद्यालयले अझै भाडामा स्कुल बस सञ्चालन गर्न लागेको बताए ।
प्रधानाध्यापक श्रेष्ठले यो समस्या केही दिनमा नै समाधान हुने बताए । विद्यार्थीहरूको संख्या धेरै भएका कारण पनि यातायातको रुट व्यवस्थापन गर्न कठिन भएको श्रेष्ठको भनाई छ । के यो समस्याको समाधान स्कुलले चाडै गर्न नसके नेपालकै नमूना स्कुलका रूपमा स्थापित भएको मान्यता कायम रहला त ?
