विराटनगर । मोरङको बुढीगंगा गाँउपालिकामा ५७ औँ राष्ट्रिय बालदिवसका अवसरमा १६ वर्षीया सुस्मिता ऋषिदेवलाई गाँउपालिकाको अध्यक्षको जिम्मेवारी प्रदान गरिएको छ ।
सुष्मितालाई बालबालिकालाई गाँउपालिकाको कामकारवाहीबारे जानकारी दिलाउने उद्धेश्यले अध्यक्षको जिम्मेवारी दिएको गाँउपालिकाका प्रमुख प्रशासकीय अधिकृत डमरुबल्लभ बरालले बताए ।
अध्यक्षको जिम्मेवारी सम्हाले लगतै मंगलबार सुस्मिताको अध्यक्षमा बैठकले बालबालिकाको नेतृत्व विकासका लागि ५० हजार रुपैयाँको बजेट थप गर्ने, गाउँपालिकामा निर्माण हुने हरेक भौतिक पूर्वाधार बालमैत्री बनाउने र बालविवाह न्यूनीकरणका लागि अभियान चलाउने महत्वपूर्ण तीनवटा निर्णय समेत गरिएको छ ।
बालबालिकाले स्थानीय तहलाई कसरी लिएका छन् र कसरी बुझेकाछन् भन्ने उद्देश्यले कार्यक्रम गरिएको बरालले जानकारी दिए । अध्यक्ष बनेकी सुस्मिताले मंगलबार आर्थिक र प्रशासनिक बाहेकका सम्पूर्ण कार्यको निरीक्षण तथा अनुगमन गरेकी छन् । यसक्रममा सुस्मिताले स्थानीय सरकार के हो र यसले कसरी काम गर्छ भन्ने अनुभूति लिन पाएको बताएकी छन् ।
